erleak_eztia-29.jpg

Eztiaren ezaugarriak

Gure artean feria sonatuetan hainbat janarien lehiaketak egiten dira, dela gaztarena, dela eztiarena, edo txakolinarena. Epai-mahaikoek gehienbat usaimena, ikusmena eta dastamena erabiltzen dituzte onenari saria emateko orduan, alegia, ezaugarri organoleptikoak deritzenak epaitzen dituzte. Jende aurrean egiten den ekintza da, eta ez laborategi batean. 

Ezaugarri organoleptikoak elikagaiaren, kasu honetan eztiarenak,  barne osaketaren agerpenak dira. Dastatzaile prestatuek irits daitezke nagusiki zein landaretik bildutako eztia den asmatzera.  Horretara ailegatuta ere, urrun leudeke eskuetan daukaten laginari buruzko xehetasun asko ematetik.

Atal honetan azalduko dira eztiak, oro har, izaten dituen ezaugarriak, bai gure zentzuekin beha genitzakeenak, bai laborategiko analisi bidez ezagutu genitzakeenak. (Norbaitek lagin zehatz batzuekin eginiko analisiak ikusi nahi baditu jo beza “Eztiaren kalitatea” atalera). 

Eztiaren ezaugarriak neurri handi batean erleak bisitatutako landareen araberakoak izango dira, baina ez da ahaztu behar erlezainaren lanek ere baldintza ditzakeela: eztia erauzteko modua (zentrifugazioz, prentsaz), edo noiz eta nola kendu dien erlei. 

Egin klik ondorengo ataletakoak kontsultatzeko:

Ezaugarri organoleptikoak: Kolorea, zaporea, usaina eta fluidotasuna.
Ezaugarri kimikoak: ura, azukreak, entzimak, proteinak, bitaminak, pigmentuak, koipekiak, aromak, azidoak eta gatzak.
Ezaugarri fisikoak: dentsitatea, kolorea, eroankortasun elektrikoa eta fluidotasuna.
Ezaugarri polinikoak: polen-motak eta polen-kopurua.
Ezaugarri mikrobiologikoak: onddoak, legamiak, bakterioak eta algak.
 

PrintEmail